Në Holandë janë raportuar 61 persona të infektuar me koronavirus në një aeroplan që fluturoi nga Afrika Jugore dhe se janë duke kryer testim të mëtejmë për të parë nëse udhëtarët e infektuar e kanë variantin Omicron.

Rastet u zbuluan në mesin e rreth 600 pasagjerëve, që arritën me dy fluturime në Aeroportin e Schipolit në Amsterdam të premten para se qeveria holandeze ta ndërprente trafikun ajror nga jugu i Afrikës për shkak të shqetësimeve rreth variantit të ri, shkruan Reuters transmeton arbresh.info

Pasagjerët nga këto dy fluturime u mbajtën të ndarë nga udhëtarët tjerë dhe ata që dolën pozitivë në test po mbahen në izolim në një hotel afër aeroportit.

Një zëdhënës i Ministrisë së Shëndetësisë në Holandë tha se nuk do të dihet deri më vonë të shtunën nëse ndonjëri nga pasagjerët është prekur nga varianti i ri.

Një zëdhënës i autoriteteve publike në Kennemerland, rajoni holandez që e ka nën kontroll Schipolin, tha se rastet pozitive të pasagjerëve janë duke u analizuar nga Instituti Kombëtar i Shëndetësisë. / arbresh.info/